政情：搞搞政：鬍鬚曾運程低處未算低

發表咗「史上最廢」嘅財政預算案之後，財爺鬍鬚曾去到邊都畀人鬧，議會、民間更加人人喊打，正月未過，佢嘅衰運已經鋪天蓋地而嚟。大家記唔記得，本報喺虎年農曆年廿八搵過術數師傅預測一眾高官嘅兔年運程，根據流年八字計算，算到財爺鬍鬚曾喺農曆二月同九月運勢最差，即係話，鬍鬚曾嘅衰運未到高峰，呢次真係風車都未必轉到運囉！

香港術數家協會術數師楊子東早前話過：「鬍鬚曾喺農曆二月即使有良謀亦收效不大，去到農曆九月更加衰到貼地，容易出錯，講多錯多。」所謂「良謀」，如果得唔到市民認同，就等於屎橋，而鬍鬚曾除咗本身行衰運之餘，仲會累及上司。

四月十三號係立法會表決財政預算案嘅日子，鬍鬚曾即使過到呢一劫，仲有農曆九月更衰嘅運程等緊佢，正如楊師傅早前講過，戊戌九月嘅「火」、「土」特別旺盛，加上立春八字個「木」燒旺九月個「火」，鬍鬚曾食到應一應，預計又有大鑊嘢發生，唔知會唔會係大規模上街示威發展到一發不可收拾、最終鬍鬚曾要落台謝罪呢？