政情：彭定康靠關係獲筍工？

末代港督彭定康終於搵到份筍工撈，但係咪靠自己實力就係一個謎。英國有關當局尋日宣布，提名彭定康做英國廣播公司信託主席，仲話佢上任後會認真檢討公司管治架構添。呢個位年薪高達一百三十幾萬港元，即月薪超過十萬港元，雖然仍及唔上香港啲問責局長甚至副局長嘅人工，但喺英國嚟講已算唔錯，尤其彭定康早已非當地政壇嘅一線紅人。

記得當年工黨上台後，做過保守黨黨魁嘅彭定康隨即被「放逐」去歐盟，今次佢擊敗多名強勁國內外對手，獲提名出任由英國政府資助嘅英國廣播公司信託主席，係咪同依家保守黨重新上台、同自由民主黨組成聯合政府有關，真係好值得深究，尤其負責今次招聘嘅獵頭公司負責人，據報正係保守黨首相卡梅倫嘅同學。

早喺彭定康應徵該職位嘅消息傳出後，在野工黨立即提出質疑，指彭定康同執政保守黨關係密切，一旦獲聘，勢必令本應獨立運作嘅英國廣播公司淪為親政府喉舌。今次提名其實仲有待英國文化大臣作最後拍板，但以上種種迹象顯示，呢百幾萬彭定康都袋硬囉！