政情：嫻姐訪屯門長者遇粉絲
工聯會副會長陳婉嫻盛傳明年將出選立法會嘅超級區議會議席，尋日佢代表工聯會踩入屯門出席「關愛長者大行動」開幕禮，雖然因塞車而遲到，但現場四百幾位長者嘅熱情並冇減退，見到嫻姐即刻拍掌，仲有長者要求同佢合照添。
大會安排嫻姐同煤氣公司營運總裁關育材上門探訪幾位長者，其中一位長者南叔同嫻姐講，成日喺報紙見到佢，仲話以前遇到不平事，好彩得到嫻姐咁嘅議員出頭先解決到。呢個時候，身邊嘅關育材幫口話：「嫻姐有復出壓力喎。」南叔聽到猛咁點頭，嫻姐心領神會。
嫻姐之後再去探訪第二位長者葵姨，佢一見到嫻姐就笑眯眯，原來十幾年前葵姨幫過嫻姐助選，負責去大廈洗樓叫人投票。呢個活動到底係關愛長者定係嫻姐復出嘅前奏呢？
嫻姐（右）探長者都遇到粉絲，佢嘅復出路似乎愈行愈近。