政情：發叔告別騷三高官抬轎

官場一向現實，政府高官對兩級議會亦親疏有別，搞到唔少區議員成日抱怨政府官員懶理地區事務，莫講話問責局長冇影，連署長級高官都好少見。嚟緊禮拜二（三月一號），班高官卻忽然轉性，事關屯門區議會嘅議程顯示三個署長級高官將會一齊落區議會，唔好以為呢日有重要議程，查實只係行會成員、「新界王」劉皇發最後一次主持屯門區議會大會啫，三個高官齊落區，無非幫發叔告別騷抬轎啫。

修章致連任無望

我哋早前都講過，發叔因為屯門鄉事委員會修章，連任屯門鄉委會主席無望，連帶佢嘅屯門區議會當然議員同區議會主席身份一併冇埋。嚟緊禮拜二，發叔就最後一次主持會議，正如我哋預報，發叔將會發表感人嘅離任演說，而政府都有情有義，三個署長級高官齊齊撐場，真係夾都冇咁啱。

呢三個署長級高官分別係人稱「騰雞美華」嘅民政事務總署署長陳甘美華、上任冇耐嘅勞工處處長卓永興同食環署署長梁卓文。佢哋齊齊亮相有冇需要？睇番當日大會議程，勉強一項同梁卓文主管嘅食環有關，其他兩個高官嘅亮相睇怕都係畀面派對多！

會後設宴擦番餐

據講，騰雞美華雖有「騰雞」之名，但同發叔交情非淺，今次落區送別發叔，亦可見有情有義。至於卓永興同梁卓文兩個新官，去屯門區議會做吓門面功課又好、拉吓關係都好，總之發叔面子都增光不少。據講發叔決定好頭好尾，會後將於中午喺旗下屯門間酒樓設宴，請班議員同出席嘅高官食番餐，一於投桃報李。