監管不力保養差 搭(車立)有如搵命博

唔知幾時開始，香港變成一個處處陷阱嘅危險城市，市民日日提心吊膽，步步為營，揸車驚畀醉駕藥駕狂徒撞到，行街驚畀冧招牌冧樹砸到，就算走去冇車冇樹嘅行人專區，都可能畀鏹水彈擲到，最恐怖嘅係不時發生升降機事故，市民出入隨時遇着墮驚魂，真係着上鐵甲威龍裝備都未必保到條命仔o架。

呢，十幾日前咋嘛，馬鞍山錦英苑錦順閣又發生恐怖事故，兩名住客搭上到十三樓，突然「砰」一聲，成部撞埋大堂門，道門被撞到移位變形，一半吊入槽，雖然消防員及時趕到救人，住客已經嚇到三魂唔見七魄。

最得人驚嘅係，呢單畸士只係冰山一角，過去四年，香港每年平均發生二百三十幾宗升降機意外，幾乎無日無之。咦，自從○八年大埔富善邨墮事故以來，港府唔係成日話會加強巡查咩？唔係話已經加強監管承辦商咩？點解仍然不斷發生同類事故，甚至愈來愈嚴重呢？

原來，一切皆因錢作怪。話說政府部門為咗慳錢，十幾年前帶頭將電梯維修同保養工作公開招標，價低者得。呢個做法雖然慳錢，但係對電梯安全構成極大隱患，一來，招標採用綑綁形式，就算同一屋苑有唔同牌子嘅升降機，都會交畀同一公司承辦，結果維修人員遇到唔熟悉嘅升降機，根本冇能力應付。

二嚟咯喎，公開招標引起惡性競爭，維修及保養費用由每月五千元鬥到二、三千元，承辦商惟有將貨就價，以前三人一組做嘢，依家兩人一組，以前每星期抽檢一次，依家兩星期一次，升降機零件唔捱到最後都唔換，而且用內地貨代替外國原廠貨，總之就錢字行先，慳皮至上。

有維修人員大吐苦水，話每個月差唔多要檢查八十部，仲要隨時走去做緊急維修，本來每部要檢查兩個鐘，實際上得十幾分鐘，有時門未打開都當檢查咗。咁「保養」法，想唔出事都幾難啦！

講到呢度，太一叮真係覺得好荒謬，升降機保養關乎人命安全，唔同買棵菜，點可以將貨就價o架！其實，好多私人屋苑都想選用優質承辦商，無奈機電署雖然有記分制，但相關資料唔夠公開，搞到佢哋一頭霧水，最後咪惟有揀平嗰間囉。

講到底，升降機事故不斷發生，原因千絲萬縷，招標制度有問題，監管力度又唔夠，再加上評級資料透明度不足，市民想揀好公司都唔知從何揀起，呢啲問題未解決，無論機電署點樣巡查都係嘥氣。

好心當局加多兩錢肉緊，多管齊下解決問題啦。你知啦，機器冇眼，墮驚魂揮之不去，好難保證下次唔會輪到政府大樓，到時嚇到啲身嬌肉貴嘅高官鼻哥窿冇肉就搞笑啦，叮！