政情：鬍鬚曾亂吟詩咒港淪貧民窟

財爺鬍鬚曾前日發表嗰份預算案結語拋書包，引用十九世紀美國詩人惠特曼（Walt Whitman）詩句「偉大的市民成就偉大的城市」，本來傳誦千古嘅好句，由鬍鬚曾讀出，即時乜feel都冇晒，跟住仲發現詩句仲有下文，只係鬍鬚曾食咗落肚唔講咋！

預算案引經據典，浸鹹水大嘅鬍鬚曾有經史子集唔用，睇中出生於美國紐約嘅惠特曼。呢位被譽為「自由詩之父」嘅美國十九世紀詩人，生前又喺廢除奴隸制上立場反覆，令其生平頗具爭議性。咁點解鬍鬚曾今年撰寫預算案，對惠特曼嘅詩句情有獨鍾呢？預算案無交代，但睇埋詩句下半截，即刻豁然開朗，真相大白。

詩句全句係咁寫嘅：「偉大的市民成就偉大的城市：就算只剩下貧民窟，仍是全世界最偉大的城市。」鬍鬚曾只引用詩句前半截，隱藏咗後半句，有何考慮，只有佢自己心知，但文字係內心嘅鏡子，佢咬文嚼字背後，為政思路亦不慎露底，反映佢根本唔理民間疾苦，唔怪得預算案對窮人咁孤寒，令到好多「籠民」同板間房嘅低收入家庭仲未脫貧。套用詩句下半截嘅意思咪變咗：「（香港）就算剩下籠屋，仍是全世界最偉大的城市。」只係鬍鬚曾秘而不宣啫！

惠特曼上身 扮受迫害？

按呢條思路追源溯始，預算案唔退稅派糖紓困，對鬍鬚曾嚟講係理所當然；唔理基層煙民叫苦連天，大幅加煙稅四成，唔肯推出壓抑樓價新措施，任由樓價飆完再飆，等上車無望嘅無殼蝸牛繼續捱貴租，就更加唔關佢事，最緊要成就佢心目中嘅偉大功業，守住庫房做守財奴！

尋日有電台節目主持人問鬍鬚曾，惠特曼農民出身，經常受迫害，預算案以佢嘅詩句作結語，係咪想話自己訂定預算案受盡各方壓力，鬍鬚曾就冇正面回應嘞，只係話要向市民多解畫。