政情：劉展灝呻守財奴唔聽意見
預算案劣評如潮，中小企業都唔滿意。好似前晚喺馬場見到鐘錶界老行尊嘅工業總會副主席劉展灝，佢坦言對預算案一啲都唔失望，事關佢哋工業界完全冇期望。
佢話工總年年都喺預算案公布前，向政府反映工業界同中小企嘅意見，希望幫助吓業界發展，但係年年嘅建議都石沉大海，業界都習慣晒靠自己㗎喇！佢呢番說話真係講出唔少人嘅心聲，反映財爺鬍鬚曾諮詢無誠意。
跟住見路過嘅專業會議立法會議員石禮謙批評，鬍鬚曾最蠢就係建議大幅增加私家車首次登記稅，以為可減少交通擠塞，但只會逼市民用舊車，令空氣污染更嚴重。