政情：搞搞政：局長立會瞓覺係團隊精神

話說十二個局長前日喺立法會會議廳齊撐鬍鬚曾，但個個力不從心，捱咗兩粒鐘聽佢嗰份冇新意嘅預算案期間，教育局局長孫明揚首先棄守，唔夠半個鐘就開始瞌眼瞓，保安局局長李少光、政制及內地事務局局長「林公公」林瑞麟緊隨其後，仲瞓到冇晒儀態，差啲跣落枱面。

林公公失手畀傳媒影到佢瞌眼瞓，張相其後更被網民瘋狂轉載。佢尋日聲言自己當時只係「靜心聆聽」，唔係瞓着喎。咁不敵睡魔嘅孫公呢？佢竟然話只係同佢一齊體現團隊精神喎！吓！咁兜法都得？

班問責官員成口掛喺口邊嘅「團隊精神」，原來係咁嘅，睇怕佢哋好似電影《潛行凶間》咁，成班人一齊瞓覺發夢都算夠隊形囉！再講，新年期間大家都鍾意祝人「步步高陞」，特別係做官嘅添！但林公公竟然覺得呢句唔啱聽，不斷重申自己「平平穩穩」就得嘞。可能喺呢個現屆政府任期將盡，來屆政府又情況未明下，「平平穩穩」唔跌落嚟就已經係最好，喺看守政府做問責官員，要保持民望分數平穩唔跌，更加係一啲都唔容易，睇吓佢身邊嘅同僚就知。