粟米斑塊飯幾錢？曾：唔鍾意食

【本報記者】新一份財政預算案被轟為「超廢預算案」，曾俊華昨日分別出席電台節目及立法會會議，遭市民及議員怒罵、狂轟近四小時，但他全程「人肉錄音機」上身，懶理市民質問。當各方揶揄他不知民間疾苦，「連粟米斑塊飯都唔知幾錢」時，曾俊華更發揮無賴本色指：「係因為我唔鍾意食粟米，亦唔鍾意食斑塊！」其「等收工」心態盡見一斑。

不知民間疾苦

史上最廢的預算案公布兩日後，民怨一浪接一浪，曾俊華昨日出席電台節目，被市民炮轟個半小時，但他全程扮演「錄音機」，反覆重申已考慮多項因素才推出這份預算案，強調再無微調空間。

面對中產市民質問為何「乜都冇」，曾俊華更加完全不作回應，僅叫對方「細心啲睇（預算案），其實你係有份受惠」。當被主持質疑他不食人間煙火「知唔知粟米斑塊飯幾錢」，曾俊華沉默數秒後，九唔搭八回應道：「我最近冇食過呢樣嘢。」

之後，當曾俊華到立法會出席預算案簡報會，繼續被議員炮轟不知民間疾苦，怎料曾俊華惱羞成怒，以強硬語氣反駁：「我唔知粟米斑塊飯幾錢，係因為我唔鍾意食粟米亦唔鍾意食斑塊。」令整個會議廳的議員愕然無語。但對於多方批評的預算案焦點模糊、扶貧不力，他卻大耍太極，指預算案「聚焦咗喺唔同嘅範疇度」。