庫房水浸硬番鋪 回購隧道莫遲疑

每隔一兩年，本港都會上演一幕隧道加價攻防戰，鋪鋪都係由賺到盆滿缽滿嘅隧道公司發難，申請大幅加價，搞到媽聲四起，政府例牌勸吓隧道公司，要佢哋收回成命。但大結局千篇一律：隧道公司成功獲准加價。

因乜事隧道公司咁把炮嘅呢？事關佢哋手握撒手鐧，叫做專營權。撒手鐧一出，莫講話政府，就連司法機構都要畀面。嗱，擁有東隧專營權嘅新香港隧道公司前年申請加價，政府開頭係威係勢咁否決申請，但隧道公司一申請司法覆核，政府即時舉手投降，加價幅度仲由五巴仙升到十巴仙添，問你服未？

隧道公司食過翻尋味，舊年又申請東隧加價四成，理由係盈利未達回報率十五巴仙，佢哋仲講，就算今次獲准加價，整個專營期回報率預計亦只有十四點五巴仙，低過合理回報率下限咁話。

大佬呀，香港地做生意，有邊瓣係賺硬十四、五巴仙㗎？東隧截至○九年底派發股息總額近四十七億元，仲係人心不足蛇吞象，市民有乜法子唔媽媽聲。各界要求政府否決申請，政府係咁意游說咗一番，但隧道公司一於冇面畀，堅持要盡快將加價申請提交行政會議。政府冇籌碼，惟有忍氣吞聲。嗱，咁咪叫做弱勢政府囉。

隧道公司飛擒大咬，最終蝕底嘅係市民，隧道加價，勢必帶動交通工具加價，進一步推高通脹，莫講話基層市民，連中產階層都頂唔順。仲有，東隧加價後，肯定又搞到紅隧日日塞車。政府本來計劃推出「紅加東減」，改善三條隧道車流失衡狀況，點知東隧先下手為強，計劃胎死腹中，政府亦無符，係咪好搞笑呢？

今次東隧申請加價絕對唔係最後一次，香港社會勢必要為隧道加價爭拗不休。其實都唔係完全冇辦法嘅，隧道公司也文也武，都因為有專營權在手啫，收番專營權咪得囉。有學者建議三條過海隧道都由政府管理，按英國慣例取消收費。咁做表面上庫房收入減少咗，其實係藏富於民。好處就多咯，一係降低巴士小巴等經營成本，令公共交通有減價空間；二係隧道暢通，減少塞車，修改公路建設布局同規模，慳番大量公帑；三係減少空氣污染，有利市民健康；四係過海方便咗，企業經營效率上升。

一家便宜多家着，政府點解唔做呀？講真，回購東西隧事不宜遲，愈拖回購成本就愈高。唔該政府硬番鋪，趁家陣庫房水浸，快快趣趣搞掂佢啦，一了百了，皆大歡喜。唔通日日畀人哋鬧弱勢政府好過癮咩？叮佢個鎯鎯！