政情：搞搞政：邱騰華惡搞堆填 立會嘥錢執手尾

舊年政府擴建堆填區事件鬧到滿城風雨，搞到行政、立法關係去到劍拔弩張嘅地步，不過始終民意不可違，最後政府咪又係跪低，連司法覆核都冇提出。當時爭拗立法會有冇權廢法嘅問題到依家都未解決，立法會仲成立咗個小組研究。

小組尋日召開首次會議，為咗研究呢啲咁深奧嘅法律問題，立法會秘書處預備咗一份二百幾版紙、成本小說咁厚嘅文件畀議員開會。小組主席話，即使只屬個別例子嘅擴建堆填區爭議已經完咗，但都應該搵個應付方法，等萬一將來政府同立法會又意見相左時知道點樣處理，所以小組會研究吓立法原則、《基本法》賦予立法會嘅職權等嘅問題，仲會聽法律學者同兩個律師會嘅意見。

若果當初環境局局長邱騰華就擴建堆填區做好諮詢，遇到反對唔好與民意為敵，咁就唔使累立法會花咁多公帑同人力物力去幫佢補鑊啦！依家洗濕咗個頭，立法會惟有硬着頭皮做落去，都係邱騰華嘅錯。