政情：阿Paul騎呢修訂恰公文袋

立法會下禮拜三恢復行政長官及立法會選舉（修訂）條例草案二讀同三讀表決，預計各黨派將就新增「超級議席」參選資格展開激辯。立法會旅遊界議員阿Paul謝偉俊前日入紙提出修訂，但修訂相當騎呢，就係限制「三高」人士出選超級議席，即身高超過五呎四吋、學歷超過高中水平、月薪高於一萬蚊嘅人士，全部應該同超級議席講拜拜。

喺現任議員入面，睇怕公文袋係唯一三個條件都唔符合嘅政黨，阿Paul一直同公文袋有唔少牙齒印，莫非想搞死公文袋？佢尋日話無意針對任何人，解釋好多人反對取消選舉開支上限，覺得益咗商界參選，但佢認為呢個諗法係將金錢當成罪惡，唔恰當。佢覺得選舉中唔止有錢人有優勢，高大英俊嘅、學歷高嘅都會吸引到人投票支持，所以如果選舉要設金錢限制，連學歷同身高都應該限制。

加入咁多限制，驚唔驚被質疑歧視先？佢話今次只係想引發討論，自己都唔會支持呢個修訂，希望大家唔好覺得佢搞事。