政情：金勞詹勸發叔上岸

政壇有新陳代謝先至健康，立法會金融服務界代表「金勞詹」詹培忠尋日透露，○四年捲土重來當選至今，轉眼到明年換屆已經有八年，乜都夠皮，決定唔再競逐連任，功成身退，安心「上岸」。聽金勞詹講，佢仲勸埋近排是非多多嘅「新界王」劉皇發急流勇退添！

新界鄉議局主席發叔近期面臨好多挑戰，「倒劉」之聲喺鄉紳之間愈嚟愈響，屯門鄉事委員會更通過修章，「技術性」攔截曾任多屆鄉委會主席嘅佢競逐連任，令佢連帶喪失屯門區議會主席之位。但政界流傳，發叔有意部署捧兒子劉業強做屯門區議會主席，鋪路日後東山再起。

預言劉業強 冇興趣接班

但金勞詹尋日踢爆，發叔對近日嘅負面新聞感到心煩氣躁，菜園村「路費」風波結束後，發叔同佢大呻，話傳媒對佢好唔公道，佢出手擺平「路費」爭拗，搵善長出錢買起條路送畀村民，冇人讚佢，但對佢之前炒樓「摩貨」同被敵對勢力狙擊，就咬住唔放。

聽到發叔咁講，金勞詹即刻回敬一句：「你知就好啦，咁仲唔退！」然後佢苦口婆心咁勸戒發叔，指如果第日學穆巴拉克咁畀人推翻，以前做過嘅好事，冇人會記得，只係記得你嘅衰嘢，咁又何必呢？金勞詹仲預言劉業強冇興趣做「新界王」接班人添！

金勞詹想拉埋發叔「上岸」，但發叔聽唔聽就係另一回事。我哋尋日問過發叔，佢承認阿仔無意接班，佢亦唔會逼個仔。咁佢呢？佢答得好玄，話已經做咗五十幾年村代表、四十幾年鄉事委員會主席、三十幾年鄉議局，總有退嘅時候，放下包袱，何等舒服云云。我哋以為佢畀金勞詹點醒咗啦，點知再問佢幾時退落嚟，佢就話鋒一轉，指佢個人退唔退、幾時退，自己會決定，唔使人幫佢決定。咁講即係暫時冇打算「退休」囉！

咁又係，事關仲有啲原居民暗撐發叔㗎。話說有原居民去信民政事務局局長曾德成，指有多個鄉議會進行修章，令部分人士唔能夠參選並唔公平，要求民政局盡快同鄉議局商討有關事宜。