公院醫生大逃亡　醫療質素誰保障

近年公立醫院醫生流失嘅消息幾乎無日無之，早就唔算新聞。嗱，新界西聯網就係其中一個重災區，早排傳出內科醫生大逃亡，家陣又輪到放射科。屯門醫院放射科二十七個醫生走咗四個，佔一成四咁多，一直補唔番空缺。

係人都知道，放射診斷即係照Ｘ光，醫生好似多咗對眼，可以睇清楚病人身體內部嘅問題，然後至可以對症落藥。冇咗呢對眼，醫生就會盲摸摸，分分鐘斷錯症。所以放射診斷係必不可少嘅醫療步驟。

講真，放射科愈係重要，就愈為屯門醫院嘅病人擔心。放射科少咗咁多人，工作量大增，容乜易忙中出錯呀。如果睇漏眼，講唔埋會累人一世。假如一個唔該將兩張Ｘ光片調亂，搞到該開刀嗰個冇開刀，唔使開刀嗰個反而捱一刀，咪仲大鑊？咪以為太一叮靠嚇，屯門醫院不嬲事故多多，輸血都可以調錯血包，撈亂Ｘ光片又有乜咁奇噃。

話時話，屯門醫院因乜事會留唔住啲醫生嘅呢？無他嘅，人望高處，水向低流，現時私家醫院急需放射科醫生，不惜用兩三倍價錢挖角，仲提供良好晉升機會，公院醫生又點會唔心郁呀。

本來呢，有啲醫生喺公立醫院做慣做熟，都唔想跳槽嘅，可惜醫管局對人手緊缺視而不見，搞到啲醫生得閒死唔得閒病，惟有走得快好世界啦。香港放射科醫學院名譽秘書長張志偉就講得啱嘞：愈多醫生走，現職同事就做得愈辛苦，於是就愈多人走，變咗惡性循環。

出現惡性循環嘅唔止係屯門醫院，東區醫院放射科舊年有三名顧問醫生或副顧問醫生離職，至今仲未補番空缺，剩低嘅醫生更冇心機做嘢。其實，港九新界各公立醫院嘅前線醫護，個個都做到嗌救命。難怪有醫生直斥醫管局「當醫生係機器」。大佬呀，機器唔停咁轉都會壞啦，何況係人？

講嚟講去，都係要搵食衞局局長周一嶽出嚟叮一叮，佢自從執掌醫療衞生大權後，個心根本冇放喺發展公共醫療上面，而係想盡辦法將病人推畀私營醫療市場，至於公立醫院人手夠唔夠，會唔會影響醫療質素，就關人個關。

公營醫療系統資源錯配，最終受害嘅係病人，近年公立醫院醫療事故多到冇朋友，派錯藥、打錯針、輸錯血、開錯刀，鑊鑊新鮮鑊鑊甘。病人就算唔即時中招，亦因為醫生人手唔夠，拖長等候時間，卒之小病變大病，大病變冇命。

話時話，香港人真係運滯，遇上呢班庸官。冇計喇，惟有寄望特區政府換屆，將周一嶽叮走啦。叮！