政情：葉劉想試快餐店捧餐
新民黨副主席田北辰嘅首間地區辦事處尋日開幕，主席葉劉淑儀同另一位副主席史泰祖都有嚟撐場，葉劉仲即場將新民黨黨旗交畀田二少，寓意將新民黨新界西工作交畀對方，認真大陣仗。
田二少之前有份拍《窮富翁大作戰》，體驗基層市民嘅生活，引起唔少人談論，咁葉劉會唔會倣效？佢話以前喺英國讀書都做過捧餐送外賣，仲試過找錯錢冇咗五英鎊，可謂損失慘重，但如果要佢喺快餐店做捧餐，佢都可以一試嘅。佢又透露，屋企個菲傭尋日都有參加半馬拉松，笑稱打佢工舒服到跑長跑都得喎！
田二少就落手落腳招呼街坊，現場仲有粉絲問佢攞簽名添！佢話雖然辦事處設喺橫街，但人流極旺，如果去大街租金就貴幾十萬元，真係嚇死人。
葉劉招呼街坊技巧純熟，相信做捧餐都冇問題。
有粉絲到場問田二少攞簽名。