政情：搞搞政：毓民大舊退黨未洗底

年初經歷大地震嘅社民連，立法會議員黃毓民同「大舊」陳偉業退咗黨，另起爐灶成立「人民力量」。雖然佢哋口講同社民連恩斷義絕，但日前發現佢哋喺九龍塘又一村同荃灣福來邨掛上嘅橫額，都未曾改朝換代，依舊印有社民連嘅紅玫瑰標誌，似係仲未洗底，有誤導之嫌。

大舊尋日就話，法律上並冇規定佢哋退咗黨後要即刻拆除舊有橫額，所以自己咁做並冇違法，又話由於新年時好多舖頭都休市，所以呢啲橫額遲遲未被拆除喎，佢仲話：「係人都知我退咗黨㗎啦，點會誤導人呀！」至於毓民，喺截稿前都未聯絡到佢。

喺白鴿黨分裂出嚟嘅新民主同盟，同樣出現類似問題。身為同盟召集人嘅西貢區議員范國威，喺將軍澳區竟然同時出現印有新民主同盟同白鴿黨標誌嘅招牌同橫額，一新一舊，令人無所適從；反觀同樣退出白鴿黨嘅區議員張國強，就已經清一色換晒橫額嘞！