政情：棋哥游說鐵頭仁選特首

政治圈冇永遠嘅朋友，亦冇永遠嘅敵人。消息透露，建制派陣營嘅廠商會喺上禮拜五同白鴿黨食咗一次低調飯局，但規格一啲都唔低，宴客嘅廠商會除會長黃友嘉，仲有元老級嘅榮譽會長、全國政協常委陳永棋，白鴿黨就由主席「鐵頭仁」何俊仁帶隊赴宴。

據與會者透露，棋哥席間突然游說鐵頭仁出戰明年特首選舉，讚白鴿黨理性務實，又話鐵頭仁比起一啲淨係識用英文思考嘅人好得多，矛頭直指公文袋。棋哥仲話如果鐵頭仁參選特首，就算唔會畀佢提名票，都會給予精神上支持！棋哥向來被視為北京代言人，突然游說白鴿黨競逐特首，背後玄機，真係好惹人揣測。

尋日問過棋哥，佢承認有叫白鴿黨選特首，但只係傾談間衝口而出，認為白鴿黨係民主派內嘅最大黨，若民主派選特首，理應以白鴿黨做代表，人選有鐵頭仁同副主席「單雞」單仲偕，但鐵頭仁冇乜回應，佢亦冇再講落去。

鐵頭仁尋日話飯局只係一個禮貌性會面，同早前黃友嘉去白鴿黨總部交流經濟政策一樣，並冇其他政治含意，又話相信棋哥叫佢出選特首只係講笑，強調個人從來冇諗過落場跑馬仔，白鴿黨至今亦未有就是否參選統一意見，要思考清楚希望爭取乜嘢先決定點做。