政情：坐享亞太第二高年薪煲呔曾政績九流

財經頻道CNBC報道，亞太區最高薪嘅政治人物係新加坡總理李顯龍，年薪二百二十萬美元，即係一千七百萬港紙，認真唔嘢小！排第二嘅係年薪四百一十萬元嘅煲呔曾，比排第五位嘅日本首相菅直人高一倍人工，呢個排名同煲呔曾嘅政績同工作量簡直成反比！

任鬍鬚曾做守財奴

新加坡喺李顯龍治下，近年旅遊業大旺，上年經濟增長一成四，最難得係李顯龍唔似得煲呔曾做守財奴，預算案啱啱宣布以三十二億坡紙，即約二百億港元「派糖」利民紓困。相比之下，煲呔曾六年嚟政績乏善足陳。

新加坡有「共享」嘅傳統，過去多次派錢，與民同享經濟成果；另一方面，新加坡經濟高增長，最受惠嘅係高增值行業，令國民收入差距拉闊，所以政府透過有形之手進行財富分配，向窮人派錢，愈富有嘅則受惠愈少，藉此消弭階級之間嘅矛盾，促進社會和諧。

睇番香港，市民並冇分享到經濟成果，貧富懸殊愈嚟愈嚴重，而政府仲㩒住荷包，令貧者愈貧。尤其煲呔曾嘅「真兄弟」鬍鬚曾上任做財爺後，年年計錯數，外界估計本年度嘅盈餘達數百億元以上，同佢估計嘅二百幾十億元赤字相差近千億元，庫房滿到瀉，佢仲要做守財奴，市民叫佢「派糖」，佢仲話「派糖」呢個字眼唔啱添！

依家香港係官富民貧，鬍鬚曾早前仲反駁呢句話，指官等如民，主動挑起社會矛盾，搞到民怨沸騰，但煲呔曾有冇敦促鬍鬚曾做好啲？佢反而翹埋雙手乜都唔做等退休，任由鬍鬚曾亂嚟。

煲呔曾有乜做？咪喺禮賓府餵吓錦鯉，得閒落西環歎吓煲仔飯囉，早前有全國政協向佢提出利民紓困嘅意見，佢仲竟然大發老脾添！咁就區內政治人物第二高薪？通脹下勒緊褲頭過日子嘅香港人睇到CNBC呢個報道，真係百般滋味在心頭，心裏冇怨氣就奇喇。