東廊裂縫非小事 路署為何要隱瞞

東區走廊落成二十幾年，每日車流量超過十五萬架次，係香港最繁忙道路之一，更加係港島最主要嘅幹道。最近，呢條幹道喺銅鑼灣入口段出現橋身移位險象，造成一條大裂縫，有一至兩厘米闊，承托橋面及橋躉嘅支座已經變形，都咪話唔得人驚。

唔係靠嚇，橋身移位裂開，後果可大可小o架，隨時橋毀人亡都有之。舊年啫嘛，河南省欒川縣發生嚴重塌橋事故，死咗五十幾人，追查之下發現成條行車橋根本冇用鋼筋。當然，香港照計唔會有咁嘅豆腐渣工程，不過咁，小心駛得萬年車，天橋安全關乎人命，一定要嚴肅對待，寧緊勿鬆呀！

大家聽聽路政署署長劉家強點講，佢好淡定咁話，上月底已發現橋身出現移位及裂縫，檢查後認為屬於輕微移動，唔影響結構安全，所以可以繼續使用喎。

真係唔講猶自可，一講把幾火。既然路政署一早知道橋身移位，點解唔即時向市民公布？點解要等到傳媒踢爆先至出嚟解畫？如果傳媒冇報道，當局係咪諗住繼續隱瞞落去吖？劉家強死撐話，「唔會咁小嘅事就去公布」。叮，橋身移位，橋面裂開，咁都仲係小事？豈有此理！

查實，劉家強指橋身移位唔影響結構安全，究竟信唔信得過，根本冇人知。呢，近年發生多宗塌樹事故，當局餐餐都話事前驗過，次次都話冇即時危險，結果咪又係塌完一棵又一棵。仲有吖，土瓜灣發生塌樓慘劇，當局亦聲稱事前驗過相關樓宇，冇即時危險喎，最後咪又係出事。所以話，港府靠得住，豬乸會上樹。

更得人驚嘅係，究竟係乜嘢原因導致東區走廊橋身移位，當局依家仲係矇查查。有工程師估計，橋身移位可能係受中環灣仔繞道工程影響，挖走東區走廊高架橋底部大量泥土，導致橋躉沉降。但路政署卻語焉不詳，淨係要求中環灣仔繞道挖掘工程暫時停工，其餘嘅嘢要等調查報告完成至知喎。

話時話，查清楚橋身移位原因固然重要，但點樣疏導交通同樣緊要。事關東區走廊交通咁繁忙，萬一日後要封閉修補，隨時引起大塞車甚至交通癱瘓都似，當局又點樣因應呢？嗱，唔好又係唔嗲唔吊，到時先至臨急抱佛腳吖喇。

無論點都好，東區走廊橋身移位，絕對唔係小事，正如古人話齋，千里之堤，潰於蟻穴，何況依家出現嘅係一至兩厘米闊嘅大裂縫。路政署漫不經心，簡直不負責任，唔通真係要見到棺材先至識流淚，叮！