輔導組織「生命熱線」尋日舉行活動，名譽贊助人及理事會主席、新鴻基地產非執行董事郭炳湘夫人李天穎全情投入，佢老友阿姐汪明荃同名人圈好友都有到場，郭太出席完嘉許禮，仲孖住幾個姊妹行去義賣嘅長枱買嘢，支持生命熱線。
生命熱線尋日舉行「義」網絡嘉許禮，宣傳「珍惜生命，一個都不能少」嘅訊息，汪阿姐到場後，除咗嚟幫義工同服務使用者打氣，又教長者做「長者護心法」。好少喺商場開金口嘅佢，仲即場唱咗首歌畀大家聽，認真畀面。
汪阿姐（左）現身支持郭太（右），仲鼓勵長者唔好鑽牛角尖，有事打熱線搵人傾。
郭太（左）出錢出力，麥餅麥片都買番包。
