政情：新界王捧大仔接區會棒？

鄉議局正副主席「新界王」劉皇發和林偉強分別失落屯門鄉事委員會同離島鄉委會主席寶座，兩人亦失去當然區議員以至區議會主席身份，兩區改選嘅爭位戰好快上演。發叔地頭屯門區已盛傳現任區會副主席梁健文會乘勢崛起，不過，江湖傳聞，發叔大仔劉業強被屬意接棒，有關安排亦方便發叔他日東山再起。

自從上星期屯門鄉委會通過修章、禁止做過兩屆主席嘅人冧莊後，發叔肯定要起身走人，連帶佢以鄉委會主席進身為屯門區當然區議員、再選為區會主席嘅經脈亦被打斷。建仔喺屯門區會三十七名議員中佔十二個，加埋隱形建制派同委任議員，梁健文做主席可謂囊中取物。如果現任離島區會副主席、同屬建仔嘅周轉香都成功攞埋林偉強嘅區會主席位，咁十八名區會主席就會有半數係建仔嘅人。

驟然失去幾項公職貌似看開，不捨之情卻難掩，聽講佢下月一日最後一次主持區會大會時，將發表感人演說，與此同時亦暗中拉攏盟友捧劉業強上位接棒。我哋就此傳聞分別向發叔同劉業強求證，發叔叫我哋問吓劉業強，劉業強又話唔清楚件事，吩咐我哋問番發叔，總之兩人都不置可否。形勢發展預料喺四月一日新一屆鄉委會委員上任後會明朗啲。