政情：搞搞政：網民諷高官逼基層跑步返工

政府拋出嘅新交通津貼計劃被批評門檻太高，好多低下層根本唔合資格，勞工及福利局局長張建宗日前雖然鬆咗口，放寬咗多少，但申請條件依然苛刻，搞到有網民喺煲呔曾嘅社交網上寸政府，揶揄申請交津咁艱難，通脹加上昂貴交通費都咁駭人，市民都係練定馬拉松好啲。高官成日嗌以民為本，似乎佢哋都應該試吓跑馬拉松返工嘅滋味噃。

煲呔曾抽水廢噏撞牆

全城矚目嘅渣打馬拉松賽今日舉行，煲呔曾尋日喺facebook抽水，話自己今日都會出席幫啲跑手打氣，不過，佢跟住喺文章大談長跑好手嘅「撞牆」（體能臨界點）經驗，話只要能夠成功克服撞牆，牆嘅另一面就係海闊天空。其實，煲呔曾咁叻「撞板」，講撞板經驗仲在行啦！

佢貼咗文章冇耐，已經有唔少網民回應，大家仲借馬拉松，趁機大鬧政府，有人話：「支持！大家跑多啲，跑步返工，咪唔使申請交通津貼囉！」亦有人坦言冇興趣睇煲呔曾跑馬拉松，想睇佢掃街瞓街多啲。每年高官都會喺馬拉松做騷，今年應由張建宗帶隊跑，甚至試吓跑步返工嘅苦處，咁樣制訂政策先唔會咁脫節。