政情：吳永嘉百樽藍茅訪台會友
內地高檔白酒茅台酒近幾年身價激升仲勁過好多藍籌股，過年前更鬧酒荒，價格一度扯高兩倍，成為有錢都買唔到嘅珍稀品。日前見到香港茅台之友協會副會長岑永生同秘書長吳永嘉，佢哋都話，相信炒高茅台價只係短暫現象。
吳永嘉話，過年送禮自用嘅需求突然大增，搞到市面上五百毫升裝嘅茅台，由一樽千零蚊叫價至三千幾蚊。佢話，呢啲矜貴國酒一定要喺貴州省茅台鎮，以當地水質再配合微生物、濕度先至釀出咁甘香佳釀。以前酒廠試過去其他地方設廠，最後都失敗而回，加上茅台需要幾年時間發酵，係純天然靚酒，所以冇得隨便增產。
酒廠供應畀協會嘅係藍色包裝，俗稱藍茅。吳永嘉話，兩個月前佢哋啱啱帶咗百幾樽藍茅去台灣訪問，喺台北同高雄搞咗兩場「茅台之夜」，成班茅台發燒友一掃而空，大家盡興而歸。
