政情：張炳良又倒米吹脹樓市泡沫

樓價飆升，香港人苦不堪言，樓市泡沫愈吹愈大，政府高官至今冇新招，好多人都寄希望於新一份預算案，不過，身兼行政會議成員嘅房委會資助房屋小組主席張炳良尋日出席個活動時，就講到明市民唔好太高估政府調控樓市嘅能力，暗摑政府一巴之餘，仲話內地多個城市鐵腕收緊買樓資格，實逼到啲購買力轉移香港，暗示本港樓市走唔出僧多粥少嘅亂象，即係樓價高處未算高，泡沬仲會再吹脹！

樓市失控，搞到市民對預算案嘅期望愈嚟愈高，不過，張炳良尋日卻大潑冷水，佢認為，政府調控私營樓市嘅能力唔高，即使增加供應，都受到環保及土地規劃影響，好似家吓政府推咗限呎細樓，又有先租後買嘅置安心計劃等，但對樓市有幾多效果，都要等落實至知。

港府無法干預買樓

佢對置安心嘅睇法同唔少市民嘅灰心相若，咁係咪代表行政會議成員都對呢個計劃有保留呢﹖張炳良喺房屋政策上多次同政府意見唔同，甚至被迫唱反調，今次又覺得香港樓市仲會升，真係有倒鬍鬚曾同煲呔曾米之嫌。

不過，張炳良尋日亦小罵大幫忙，佢話，本港樓市高溫難下，其中一個原因係內地將購買力趕咗嚟香港，因為內地好多城市可以用行政手法干預購買力，但香港卻冇辦法阻止，結果，內地有錢人冇得喺內地買樓，可以走嚟香港買啫，喺需求仍然暢旺下，香港樓市又點降溫呢？

其他嘉賓亦認為，「香港市場嘅特性係向全中國開放，政府要有政策，等香港人可以受惠」，佢哋要求復建居屋，唔好重蹈董建華年代八萬五政策嘅禍害。