奶粉愈炒愈離譜 港府豈能袖手觀

潮流興網上購物,大家又知唔知近期網上最受歡迎嘅產品係乜嘢呢?唔係名牌手袋,亦唔係絕版波鞋,而係奶粉。係吖,冇錯,係嬰兒食嘅奶粉吖。呢,最近多個拍賣網站都出現炒奶粉黨,自稱手頭有大量缺貨品牌奶粉,仲話要成箱成箱賣添,至於價錢咯喎,足足比市價高出兩三成!

唉,又唔怪得炒奶粉黨咁猖狂嘅。事關內地頻頻出現問題奶粉,三聚氰胺陰魂未散,家陣又有皮革奶粉,搞到內地同胞對國貨冇晒信心,爭相走嚟香港搶購外國奶粉,搶吓,搶吓,搶到奶粉供不應求不特止,價錢仲不斷咁升,於是乎,炒奶粉黨應運而生。

呢嗱,有人全家總動員,喺藥房或連鎖店大量購買奶粉,然後裝箱交畀水客帶入內地高價銷售。更有人將炒風搬上互聯網,炒到不亦樂乎。例如,有款供一至三歲嬰兒食用嘅奶粉,舊年年底標價一百九十六蚊一罐,上月尾已賣到二百四十八蚊,短短一個月就急升兩成六,問你怕未。

炒奶粉黨囤積居奇,等同趁火打劫,呢種行為固然令人反感,而政府對奶粉炒風視而不見,見而不理,更加係不負責任。食衞局局長周一嶽話喎,將會設法解決奶粉荒,可惜得個噏字,網上早已掀起一股炒奶粉風,唔通佢唔知咩?叮!如果港府高官淨係識講風涼話,繼續翹埋雙手乜都唔做,本港嬰兒唔單止要捱貴奶粉,甚至有斷奶嘅危險,到時咯喎,睇吓周一嶽又點樣廢噏。

其實好多家長早就忍無可忍,有人喺熱門親子網站發起「奶粉稅革命」,要求當局向內地人士徵收懲罰性奶粉離境稅,稅率係奶粉價嘅十倍,短短一周就有幾百個家長響應。政府無能,市民惟有自救,可以講係非常無奈,不過咁,本港實行自由經濟,徵收奶粉離境稅事關重大,實際上未必可行,所以歸根究柢都要當局出手解決至得。

話時話,事在人為。有立法會議員建議,當局應同奶粉供應商密切聯繫,確保本港有穩定、充足嘅貨源,仲建議供應商提供熱線、訂購等服務,以助家長順利購買奶粉。係咯,如果港府肯同供應商積極合作,咪可以有效解除奶粉荒,杜絕不良炒風囉。事實上,本報早前亦建議當局喺奶粉供應情況惡化時,不妨參考大米嘅管制方法,確保供應商有一定儲存量,以保持價格平穩,穩定人心。呢啲建議切實可行,問題係港府肯唔肯做嘅啫。

嗱,唔好話太一叮唔提醒,奶粉係嬰兒主要食品,嬰兒斷奶,仲大鑊過大人斷糧,後果不堪設想。港府絕對唔可以懶懶閒,否則,等到出事先至補鑊,咁就遲o架喇,叮!

Money18 新功能「18好路數」為你預測心水股票升跌機會率