政府喺交津計劃上以「唧牙膏」方式讓步,令部分議員大表不滿,社民連「長毛」梁國雄前日更喺會議上四度向勞工及福利局局長張建宗掟膠樽以示不滿。
尋日喺一個公開活動見到全國人大常委、前立法會主席范徐麗泰,佢就批評長毛掟膠樽行為有損議會莊嚴,相信大部分市民唔希望見到愈來愈多呢類行為,最終只會減低市民對立法會嘅接受程度。
范太話大部分市民都唔想見到議會暴力事件。