政情：煲呔曾冇品挖苦王國強

三月北京會舉行全國人大、政協「兩會」，煲呔曾前日喺禮賓府見港區代表同委員聽意見。話說政協委員KK王國強趁機向煲呔曾獻言，不如將港鐵全面私有化，取消上市地位，然後全權決定減車費一半，等市民唔使捱貴車費。但據與會者爆料，煲呔曾聽完KK發言，竟以又硬又冷嘅語氣話：「乜嘢私有化呀？係咪國有化呀！即係點呀？收番（港鐵）嚟任佢行呀！」然後仲冷笑幾聲：「哈哈……哈哈……」極盡挖苦之能事。

不歡而散有前科

煲呔曾鬥噏完收口冇耐，KK就離座步出會場。KK呢個舉動本來冇乜人察覺，但煲呔曾竟然嘴皮不饒人，當眾叫出嚟：「王國強可能嬲咗我嘞，佢走囉喎。」好多委員見到煲呔曾咁過分，都私下為KK不值，散場之後，眾人竊竊私語，覺得煲呔曾認真冇品！

尋日問KK係咪受到煲呔曾「冷待」，佢對煲呔曾冇半句惡言，話通脹嚴峻，市民最大負擔係住屋同交通開支，佢建議政府回購港鐵，都係想減輕市民壓力，少啲人搭巴士亦有助環保，佢心知建議未成熟，只想拋磚引玉咁話。

KK嘅厚德，顯得煲呔曾嘅冇品更加可憎。其實，煲呔曾因脾氣差而同人大、政協鬧得不歡而散早有前科，好似○九年，就為咗推動粵劇問題同政協汪明荃展開罵戰；其後同港區大人會面，本身做銀行嘅吳亮星質疑政府將雷曼迷債責任賴晒落銀行度，煲呔曾竟然頂番轉頭，話：「香港銀行界真係做得好差，令我好反感！」令人咋舌。經過前日KK事件，睇嚟以後佢要見人大、政協，出動八人大轎都冇乜人會再嚟。