政情：賭王累王桂壎猛接電話
賭王何鴻燊家族爭產案成為全城熱話，除咗升斗市民關注，連律師會會長王桂壎都話日日跟進，但唔係因為個人喜好，而係要應付記者無止境嘅提問，搞到佢不停咁接電話，簡直忙到爆炸。
王桂壎尋日話近排經常收到外國記者電話，向佢查詢賭王各房嘅律師中，點解有啲經常咁高調出鏡，到底有冇違反專業守則，搞到佢好尷尬，事關從來冇人提出咁嘅投訴，如果佢主動介入，就變咗好似偏幫某房人咁。
或選法律界功能組別
佢仲話外國記者唔知點解對中國人爭產嘅新聞特別有興趣，仲走嚟問佢一個人娶咁多老婆係咪唔道德，令佢哭笑不得，惟有請佢哋去請教社會學家。
已經冧莊做咗兩屆會長嘅王桂壎，仲有幾個月就完成任期，但佢爆料話唔會再競逐連任。咁會唔會出選二○一二年立法會法律界功能組別呢？佢就笑笑口咁話未諗呢個問題，似乎唔肯閂後門。