政情：人大政協教書冇難度
由全國政協常委牽頭嘅香港友好協進會將港區全國人大、政協組織起嚟，向「90後」青少年埋手，自發做義工落區去中學講國情。協進會尋日舉行新春團拜暨午餐演講，好多有份落區「教書」嘅人大、政協都有現身，佢哋異口同聲話教書冇壓力，有幾個對授課更可謂駕輕就熟。
問呢個計劃召集人李國章教國情有冇壓力，佢話依家每逢禮拜六都返中大做義工教外科，加上以前教開書，所以到中學講國情絕對冇難度。但佢形容做召集人就好似做媒人咁，要將五十個人大、政協「義工」同參與中學做配對工作。對於有人話呢個計劃係向中學生「洗腦」，李國章就好嚴肅咁話，咁講等於唔尊重班學生，事關啲中學生有自己嘅思想。
李國章話每逢禮拜六都會返中大教外科，教國情難唔到佢。
新鴻基地產非執董郭炳湘冇報名落區授課，話其他人教得好過佢。