政情：棠哥頸椎移位手術成功
早前都講過身兼行會成員嘅工聯會會長鄭耀棠頸椎移位，搞到右手同右腳麻痹，多次缺席行會，唔少政界好友都為佢擔心。不過，大家可以放下心頭大石，事關棠哥尋日做咗手術，仲非常成功添！探過佢嘅工聯會副會長陳婉嫻話，棠哥康復得非常好，右腳「揮灑自如」，應該好快出院。
由舊年十月開始受頸椎移位困擾嘅棠哥，體重曾經急跌九公斤，瘦到臉都凹晒，但一直未決定係咪開刀，事關手術風險好高，一旦失敗可能導致下身癱瘓。佢幾經考慮後，決定尋日喺瑪麗醫院做手術斷尾，消息指今次手術係由脊骨外科權威、港大創傷及矯形外科學系主任陸瓞驥親自操刀。
尋日傍晚七點幾，嫻姐、工聯會另一副會長林淑儀同老公議員「象哥」黃定光齊齊去探望棠哥，約半個鐘後離開。嫻姐透露棠哥康復得唔錯，應該好快出得院，但唔肯講確實日期。
左起：林淑儀、嫻姐同象哥尋晚到醫院探望啱啱做完手術嘅鄭耀棠。