政情：樓王張建宗點知民苦

勞工及福利局局長張建宗早前就新交通津貼計劃嘅過嚴規限辯護，死撐二人家庭每月入息上限一萬蚊已經唔算低，仲話如果兩公婆都有工做，賺到最低工資，已經唔可以話係窮人，引起好多市民同議員不滿。當然啦！張建宗貴為「樓王」局長，民間疾苦佢點會體會到吖，佢揸住八個物業喺手，佢嘅下屬常秘鄧國威同舊下屬謝凌潔貞都望塵莫及。

翻查過高官嘅利益申報，發現張建宗填報嘅八項物業，多數由太太持有，包括四個東區出租住宅、一個中西區出租住宅、一個中西區出租舖位、一個東區舖位，仲有一個就係佢哋兩公婆共同持有嘅自住單位，其他人真係睇到眼都凸埋。

相比起張建宗，佢嘅常秘鄧國威就顯得削好多，佢只係得一個自住嘅九龍區單位；至於升咗做教育局常秘冇耐嘅勞工處前處長謝凌潔貞，就比鄧國威好景少少，有一個連車位嘅九龍區住宅。

縱觀十二個政策局嘅常秘同主要官員嘅申報，絕大部分都冇乜變動，唔知係咪政府推出嘅壓抑樓價措施冇效，樓市熾熱如舊，所以佢哋都唔敢增持呢？但話雖如此，有幾位高官照買樓，只係跳出香港。

羅智光喺英國置業

好似政制及內地事務局常秘羅智光，喺舊年七月中提交嘅申報話持有一個新界區自住單位嘅一半業權，仲有一個位於蘇格蘭嘅自住住宅；到咗舊年九月尾交嘅申報，就發現佢增持咗一個喺英國嘅自住住宅。其實英國樓價比香港不遑多讓，有能力喺英國買樓，可見佢都唔小嘢。

仲有環境局常秘王倩儀，佢本來喺港島區已有兩個住宅，自住同出租各一，舊年年尾新交嘅申報中，就多咗一個喺廣東嘅自住住宅。唔通佢嫌香港空氣唔好，所以返內地買定樓？

至於廉政專員湯顯明就無懼樓市熾熱，舊年十月頭申報喺新界區買多咗一個住宅。屬王老五一族嘅佢仲喺申報寫明，新買嘅單位係畀家人用，唔知係畀邊位家人用呢？