交津不倫不類 微調唔湯唔水

有人話，交通費係壓喺打工仔頭上嘅一座大山，一啲都冇講錯。據統計，本港基層勞工每個月交通費平均佔收入超過一成，簡直係苦不堪言，而且隨着公共交通工具係咁不停加價，打工仔百上加斤，更加係冇啖好食。

港府無力阻止公共交通工具加價，於是推出所謂「鼓勵就業交通津貼計劃」，希望以小恩小惠敷衍民意，堵住打工仔悠悠之口。本來呢，有好過冇，雖然資助金額濕濕碎，但總算聊勝於無，弊就弊在班高官阿茂整餅，冇嗰樣整嗰樣，唔單止對申請者查家宅咁查，仲要以家庭為審查單位，搞到好多打工仔根本無法受惠，怨聲載道。

當局眼見有關計劃劣評如潮，不得不作出修改，點知改來改去都係換湯不換藥，講得好聽叫做「優化方案」，其實只係微調，象徵性放寬入息上限，將二人家庭月入由八千五調高到一萬蚊，三人家庭月入由萬二調到萬三蚊。至於各界要求以個人為審查單位，或者採取個人及家庭雙軌審查，以及放寬每月須最少工作七十二小時嘅規定，當局一於企硬唔肯接受。勞工及福利局局長張建宗仲沾沾自喜咁話，經過修改之後，受惠人數會由原本嘅三十三萬人增至三十八萬人喎。

叮，信佢一成，雙目失明！正如有人話齋，如果兩夫婦都領取最低工資，已經超出入息上限，根本冇資格申請，又何來有三十八萬人受惠吖。太一叮諗極都唔明，呢個計劃叫做「鼓勵就業交通津貼計劃」，本來係鼓勵打工仔跨區工作，以降低失業率，但由頭到尾都只聽到政府喺度計算家庭資產同入息，完全冇考慮申請人工作地點有幾遠、交通費開支有幾多，所謂交通費資助，名不副實，九唔搭八！

仲有吖，呢項計劃究竟可以令幾多打工仔受惠仲係未知之數，但勞工處已經計劃成立一個二百人嘅新部門處理有關申請。大家試諗吓，二百人嘅部門每年要使幾多公帑呢？隨時妹仔大過主人婆，扶貧不成先扶官呀，叮！

講開又講，向低薪打工仔發放交通津貼，鼓勵就業，自食其力，本來無可厚非，弊就弊在當局閉門造車，又唔肯順應民意，搞到成個計劃不倫不類，唔湯唔水，最後可能變成口惠實不至，咁就真係得啖笑咯。唔怪得好多立法會議員話到明對呢個微調方案唔收貨，要求押後審議喇。唉，張建宗成事不足，敗事有餘，淨係識得添煩添亂，從來冇做過一齣好戲，睇吓今次佢又點收科！