政情：中總酒會600名人到賀
雲集城中富豪嘅中華總商會尋日舉行新春酒會，逾六百位政商界名人到賀，中總會長蔡冠深、多位副會長包括林樹哲同莊學山等人齊撐場。蔡冠深呢個主人家梗係要盡地主之誼接待啦，佢滿場講恭喜發財，真係人人聽到都咁開心。
中總青年委員會主席兼金利來太子爺曾智明（Ricky）都有現身，見佢瘦咗成個圈，原來佢過年前患上感冒，到家吓都未好，褲頭鬆咗唔少，不過Ricky堅持瞓身工作，仲話會拍住初任青委會副主任嘅林智彬齊齊搞好會務喎。
蔡冠深（右二）做東搞新春酒會，經濟動力立法會議員梁君彥（左一）、李錦記集團主席李文達（左二）、保安局局長李少光（中）同經濟動力立法會議員林健鋒（右一）齊撐場。
金利來太子爺曾智明（右）同林智彬（左）都係年輕有為嘅中總生力軍。