政情：陳裕光唔敢再掂最低工資

首個最低工資水平有望喺五月一號實施。尋日政府公布最低工資委員會嘅正式任命，好多臨時委員會嘅成員都獲續任，但有份制訂廿八蚊水平嘅兩位大企業老闆—大家樂集團主席陳裕光同新鴻基地產副主席郭炳江，卻唔喺名單中，似乎唔想再掂呢個燙手山芋。

新委員會任期兩年，三月一號起生效，主席由資深大律師翟紹唐出任，接替臨資會嘅鄭若驊。九名非官方成員當中，三名勞工界代表、嚟自本港三大工會嘅工聯會鄺志堅、職工盟劉千石同勞聯李啟明全部順利過渡；三名學術界代表就全數換上新人；至於三名商界代表，就只得香港零售管理協會主席麥瑞琼留低，另外兩人為聚福樓執行董事黃傑龍同銀聯信託董事總經理及行政總裁劉嘉時，接替陳裕光同郭炳江。

經歷大家樂「飯鐘錢」一役，陳裕光曾自嘲政治智慧不足，亦早揚言一把年紀唔適合做粗重工夫，劈炮都預咗。至於新地「二哥」郭炳江，就因富貴黨副主席張宇人爆出「廿蚊」事件時，畀人質疑「廿蚊張」係受僱於新地旗下嘅公司，謝絕再玩係明智之舉。