政情：高官唔識潮語囧到爆

由網絡語言到「80後」、「90後」社群間興起嘅潮語，考起好多人。尋日立法會舉行一年一度春茗，按傳統，議員同高官會嚟一場大戰，今次秘書處揀咗潮語呢個題材，整個「潮語正解大比併」。結果點呢？一向不知民間疾苦嘅高官又衰咗喇，而一向以平民化語言喺立法會開罵嘅議員贏咗七比四。

高官隊成員有發展局局長林鄭月娥、審計署署長鄧國斌同工業貿易署署長關錫寧，佢哋都係政務官出身，見到潮語就一臉無奈。其中一條題目係「囧」字，三人望住題目冇表情，梗係畀人揭謎底兼取笑佢哋係一副「囧」（字形似面部表情，解無奈，苦惱）樣啦！

到咗搶答環節，林鄭又搞唔清「毒男」（缺乏異性緣嘅單身男人）同「宅男」（隱蔽男）之分，搞到搶分不成反扣分。議員隊狂砌高官隊，場中嘅煲呔曾卻施施然邊剝花生邊睇戲，成隻塘邊鴨咁。今年春茗嘅菜式同往年差唔多，不過就多咗由韓國同緬甸領事分別送上嘅米酒同威士忌助興，唔少議員都飲得開懷，出名鍾意飲酒嘅政務司司長唐唐就耍手擰頭。