政情：胡兆英未開閘先脫腳

新正頭爆單本港導遊同內地遊客爭執致講手事件，既令有購物天堂美譽嘅香港再一次蒙羞，旅行社、導遊甚至負責監管嘅旅遊業議會更加麻煩多多，旅議會主席胡兆英因經常喺第一線回應點樣監察「翻版阿珍」事件，搞到內外都唔討好，尋日仲畀當選以嚟就多番針對旅議會嘅立法會旅遊界代表謝偉俊（Paul）狙擊，彈旅議會嘅一團一導遊制度唔了解入境團生態，又質疑旅議會踩過界，胡兆英今次真係一身蟻囉。

被踩唔了解入境團生態

呢次爭端其實同立法會選舉有千絲萬縷嘅關係，一直盛傳屬於經濟動力嘅胡兆英有意下屆出選，或者係咁，佢一路好高調，曝光率比以往嘅旅議會主席高。上屆主席何栢霆在位時，旅議會多由總幹事董耀中出嚟擋架，但胡兆英喺「翻版阿珍」事件發生以嚟卻一直親自處理，仲第一時間話會調查涉事旅行社係唔係違反咗啱啱實施嘅一團一導遊制度。呢種態度對外界可能係問責，但業界嘅睇法卻唔係咁。

其後又搞出賠償問題，市民對本地旅遊業嘅失望情緒唔多唔少都倒咗喺出頭嘅人身上。尋日胡兆英出席個電台節目，阿Paul專登打上去踩場，不斷猛烈批評一團一導遊規定影響業界生計，仲質疑胡兆英自己唔係做內地團，暗指對方根本唔認識入境團嘅生態同處境。

胡兆英亦唔係省油嘅燈，強調旅議會唔係一個人可以話晒事，但阿Paul再反駁指旅議會裏面根本就冇接待內地團嘅旅行社代表，又批評旅議會遏制反對聲音，兩個人唇槍舌劍下，最終都要主持打圓場先收到科。點都好，旅遊界中人透露，胡兆英喺中小型旅行社裏面失晒分，再被阿Paul狂轟之下，有幾傷都未知，呢條由旅遊界進身政界嘅路真係唔易行㗎。