港鐵管理超廢 故障三周兩劑

內地鐵路已經進入高鐵時代，本港鐵路居然成日退番去「慢車歲月」，話之你心急趕返工定係急急腳趕返學，隨時跪低，郁下慢駛，你話係咪羞家吖。

嗱嗱嗱又嚟嘞！港鐵金鐘至尖沙咀路軌尋日朝早發現有裂紋，港鐵發出黃色警號，金鐘至尖沙咀往荃灣方向列車行車時間比正常多四分鐘，好多乘客返工遲大到，四個鐘頭後服務至回復正常。

上個月十九號又係朝早繁忙時間，東涌線近欣澳站路軌同樣發現裂紋，列車每班延遲幾分鐘。三個禮拜內，因為路軌問題連衰兩劑，港鐵嘅管理都好廢啫。唔通列車服務開始之前，冇檢查過路軌嘅咩？

港鐵話，工程人員處理訊號故障嗰陣，發現路軌有裂紋。出事路軌前日至經過例行目視檢查，但冇發現裂紋。咁就奇嘞，乜條路軌幾粒鐘內無端端會裂嘅？九成係檢查嗰陣粗心大意冇發現啦。

目視檢查容易睇漏眼，就算用機器都唔擔保一定查得出，更何況係人。有工程界人士直指，目視同超聲波兩種檢查都唔係百分百可靠，建議港鐵增加檢查嘅頻率。

路軌裂紋唔及時處理，後果可大可小，搞唔好「車毀人亡」都有份。路軌點解再三發現問題，有乜方法提高檢查嘅可靠程度，港鐵有必要向市民交代清楚。

立法會交通事務委員會主席鄭家富批評港鐵路軌日益老化，日常維修同人手資源都唔足夠，令事故不斷發生。議員黃成智更直斥港府一再縱容，令港鐵變咗不負責任、不能信賴、不再安全嘅「三不」機構，要求港鐵賠償乘客損失，停止向行政總裁周松崗等高層派花紅。

叮！港鐵變成無王管嘅獨立王國，港府監管不力難辭其咎。港鐵每日乘客數以百萬計，但多年來事故不斷，服務質素為人詬病。舊年十月，油麻地站架空電纜喺繁忙時間突然斷裂，列車服務停頓三個鐘，二十八萬乘客受影響，但港鐵應變失當，安排混亂，乘客徬徨無助，狼狽不堪。

港府身為港鐵大股東，事後除咗打打官腔，要求徹查事故之外，其他乜都唔做，既冇港鐵高層問責，更冇人受懲處。結果係點大家有眼睇，港鐵服務冇改善不特止，事故反而愈出愈多，今日訊號故障，聽日路軌有裂紋，令乘客飽受滋擾。

話時話嘞，踢波有「兩黃一紅」嘅規矩，如果球員攞第二張黃牌，就要畀裁判出示紅牌趕出場。港鐵連續「犯規」，咁短時間內連爆兩鑊，如果港府仲唔攞張紅牌出嚟，一定會畀市民噓到面黃。叮！