政情：霍公子等通知飲新抱茶
早前跳水公主郭晶晶退役，指佢同立法會議員霍震霆大仔啟剛拉埋天窗嘅消息就不脛而走，尋日喺民政事務局嘅春節酒會見到霍公子，問幾時有好消息，點知佢竟然會錯意，以為講緊體育政策，牛頭唔搭馬嘴完一輪至耍手擰頭迴避問題，仲好婉轉咁話有好事實會通知大家。
再直接問霍公子幾時飲新抱茶，佢好誠實咁話仲未收到囝囝通知，仲話依家啲年輕人鍾意獨立思考，唔係樣樣嘢都交畀父母決定，所以幾時先夢想成真，要交番畀啟剛決定。
咁啱得咁蹺，啟剛同爸爸前後腳咁喺酒會出現，直接問男主角到底幾時迎娶國寶，點知佢怕怕醜醜咁話，唔明點解個個最後都問佢呢條問題，而佢為咗公道起見，只會答標準答案，就係不作評論喎！