政情：搞搞政：張國鈞睇錯市做無殼蝸牛

樓價高處未算高，令淡友望樓興嘆，年幾前「升呢」做律師行合夥人嘅建仔副主席張國鈞亦睇錯樓市，所以一直要做無殼蝸牛。

張國鈞大學畢業後開始租樓住，幾年前搬入杏花邨，上年二月結婚，細屋搬大屋，搬入隔籬座一個近八百呎嘅單位，月租兩萬蚊，同任職投資銀行嘅太太共築愛巢。兩公婆肯定屬中產一族，要置業，財政應該唔係問題噃！其實，張國鈞幾年前已斥資近二百萬元，喺屯門買樓畀父母住，自己婚後反而租屋住，有錢都唔畀地產商賺，原來為啖氣。

為應唔應該買樓，佢曾經同太太鬧分歧，太太覺得依家唔買，遲啲仲貴，但佢堅持唔制，事關○九年樓價飆升時，佢睇死樓價必定跌番落嚟，點知樓價一路愈升愈有，佢惟有等完又等，忍住唔入市。「等到樓價就嚟到頂嘞，依家先至入市？真係好唔甘心囉！」

張國鈞認為樓市見頂，相信係所有無殼蝸牛嘅願望，但好多人都唔信會願望成真。佢仲話幾年前曾經同一位中聯辦處級官員閒聊，當時樓價剛起，佢誇下海口，指樓價升得咁急，脫離經濟實質增長情況，樓價必跌；幾日前，兩人重遇，呢位官員取笑張國鈞：「樓市仍然在升軌中呢！」連面子都輸埋，搞到佢相當尷尬。