政情：屈奇安做一蚊雞總幹事
加入咗葉劉淑儀檔新民黨仲做埋中常委嘅屈奇安，做咗消防處救護員會主席多年，一直不滿消防處當救護係「二奶仔」，曾向部門發炮多年，仲試過為爭取救護員有時間食飯，嘈到去中央。佢舊年年底退休，又曾傳出會轉戰區議會，好多人以為救護職方自此會偃旗息鼓，點知有江湖傳聞指佢退而不休，仲做埋救護員會嘅總幹事添！
救護員會以前只聞有正副主席，何來總幹事呢？屈總解畫，有救護前輩有先見之明，早幾年建議該會修改會章，准許聘請熟悉救護事務嘅人出任總幹事輔助會務，有權代表救護員會出去開會發言，但註明年薪只係一蚊。屈總就笑稱，自己人工好高！
佢話始終放唔低對救護個份情，老土啲講係「不離不棄」，所以不惜做「一蚊雞總幹事」，繼續為救護而戰。