政情：嫻姐再披甲譚香文有難

一直口硬話好享受退休生活、冇諗過重出江湖嘅工聯會「票后」陳婉嫻，尋日終於爆響口話「積極考慮」參加選舉。雖然佢唔肯講係參加邊個選舉，但以佢嘅江湖地位，普通地區直選點吸引到佢吖，加上自稱有可能赤膊上陣嘅會長鄭耀棠尋日承認因頸椎移位需要繼續休養，話嫻姐唔係出選立法會超級區議會議席都冇人信。

重新披甲，首要搵啱選區，參加今年底嘅區議會選舉。嫻姐嘅發迹地係以前嘅九龍中選區，即係黃大仙、慈雲山同橫頭磡一帶。地區人士講，呢一帶有工聯會背景嘅區議員一直支持嫻姐出山，所以選區唔係問題。

喺黃大仙區議會裏面，有機會讓位畀嫻姐嘅，包括林文輝、何漢文、李德康同蔡六乘。頭三個仍然係當打之年，相信嫻姐亦唔會要佢哋讓位；剩低人稱六哥嘅蔡六乘，今年則已經六十五歲。棠哥尋日亦提到，為咗培育人才，嚟緊會勸啲年紀稍大嘅現任區議員退落嚟畀人選，睇嚟六哥應該有商量。

六哥○七年喺龍星區擊敗立法會前議員譚香文，譚香文一直有意捲土重來，但如果對手係嫻姐，相信譚香文都凶多吉少。對嫻姐而言，對手係譚香文嘅話，象徵意義亦大於一切，話晒係曾經所謂「新民主女神」兼前立法會議員喎，搵佢祭旗都咪話唔過癮！