政情：捱唔住貴租方剛扯火

政府早前多次出招打擊樓市炒風，但全部都係虛招，成效得幾個月貨仔，而且全部只針對住宅，工商舖樓價同租金繼續升，令好多中小企捱唔住貴租，被迫搬遷甚至結業裁員，就連身兼立法會批發零售界議員嘅富貴黨副主席方剛，亦成為高租金嘅受害者。

經營時裝業嘅方剛尋日同傳媒講起兔年新春市道其實唔錯，但唔代表包括佢在內嘅零售業可以賺大錢，因為點好賣都追唔上租金升幅。佢自爆自九三年租落、佔地近萬呎嘅Episode中環娛樂行旗艦店，喺三年前簽落嘅租約仲係月租約一百三十萬元，到最近租約期滿，竟然一加就加到二百幾萬元，升幅高達七至八成。

煲呔曾無能削港競爭力

雖然方剛對呢個地標級舖位好有感情，話晒都做咗接近二十年嘛，但計過條數，每月要做多百幾二百萬銀生意先至維到皮，真係冇可能捱得住，迫於無奈惟有改租喺同一座大廈嘅高層寫字樓單位，轉做VIP樓上專店。不過，由於新舖面積細過以前，唔需要咁多員工做嘢，佢會盡量安排佢哋轉去其他分店或品牌工作，但亦唔排除有部分人要被迫遣散。

方剛強調唔會怪責業主大幅加租，因為個舖位真係有價有市，對方只係在商言商，佢反而炮轟政府死抱所謂嘅「積極不干預」同高地價政策，一眾高官為避畀人質疑「官商勾結，利益輸送」，唔肯推出措施支援工商界，令香港營商環境愈嚟愈差，論調同內地半官方傳媒「中國評論新聞網」日前發表、狠批港官無能令香港競爭力盡失嘅社評不謀而合。

咁又難怪方剛扯火向政府開炮嘅，事關煲呔曾政府口口聲聲話要搞好營商環境，但做到啲乜？咪又係變咗口號式，即係齋噏。