新修例形同虛設 勞工處靠害勞工

打工仔撞着無良老細，有汗出冇糧出已經夠慘啦，如果加埋無情衙門助紂為虐，企埋僱主嗰邊講說話，有冤無路訴，直頭係慘上加慘，苦過弟弟。

港府舊年修例訂明，僱主唔支付勞資審裁處裁定嘅款項，即屬刑事罪行，最高可判監三年及罰款三十五萬元，但當局有法不依，新例形同虛設。呢，郭姓司機○六年起受僱於一間轎車服務公司，入職半年後開始被拖糧數，由幾百到幾千蚊不等，計計埋埋欠薪十幾萬。佢○九年向勞工處求助，個案交勞審處處理。勞審處判其中一個僱主要向郭生賠償約十八萬及代通知金。

欠薪還錢，天經地義。但僱主唔將裁決放在眼內，拒絕清還欠薪。勞工處向對方提出檢控，法院舊年七月判二十一日內發還約十萬蚊欠薪，其餘款項經民事索償，但對方繼續睬你都多餘。案件舊年年底再審，僱主報稱無業，冇能力賠，裁判官判僱主可以分九年攤還，每個月只須還一千蚊。

郭生不滿裁決，要求勞工處代申請司法覆核。勢估唔到對方居然話，已徵詢過律政司法律意見，認為唔應該司法覆核喎。郭生好勞氣咁話：「政府官字兩個口，根本無同我解釋清楚點解唔可以覆核……分九年還，如果佢死咗，我咪一無所有！」

叮！做官嘅薪高糧準，唔憂柴唔憂米，點知民間疾苦吖。打工仔手停口停，本來希望官府出面可以攞番欠薪，點知總數十幾萬縮咗做每個月一張金牛，失晒預算，點維持生計呀？

結果係點可想而知，血汗錢有排攞唔番不特止，郭生本來諗住收到賠償就迎娶女友，點知筆錢搞嚟搞去唔見影，兩人卒之掟煲收場。你話勞工處係咪靠害吖！

有工會組織痛斥當局，既然舊年已經修例，竟然有法不依，又冇釐定刑事執法準則，令市民無所適從。鬧得一啲都冇錯！話時話，如果當局設身處地為打工仔着想，早啲針對呢類等同賴帳嘅做法採取措施，無良僱主又點會鑽到空子吖。叮！

講開維護打工仔權益，直頭火都嚟埋。記得早幾個月本港快餐連鎖店剋扣員工飯鐘錢引發嘅「全城罷食」風波嗎？事件啱啱爆嗰陣，勞工及福利局局長張建宗居然打起官腔話，現行法例冇規定員工用膳時間係咪有薪，就差在冇講埋資方剋扣飯鐘錢有理，勞方唔應該有咁多聲氣！你話打工仔旨意呢班官僚保障自己權益，餓死都有份。

當官不為民作主，不如回家種紅薯。計太一叮話齋，勞工處如果唔為打工仔主持公道，處處維護做老細嘅利益，不如索性換咗塊招牌，叫「僱主處」罷啦。叮！