政情：霍震寰預告家族有囍事
去年突然宣布退役嘅跳水公主郭晶晶等做兔年新娘，但佢同男友霍啟剛夾晒嘴形，隻字不提婚事。不過，啟剛嘅阿叔、中華總商會榮譽會長霍震寰，尋日喺一個新年團拜中就露口風，預告今年有家族成員結婚。唔通係講啟剛同晶晶？點知佢鬼馬咁笑一笑話：「未噃，你問番佢（啟剛）爸爸啦。」之後相當高興咁預告佢表哥嘅公子今年將會結婚，總之都係家有喜事啦。
睇見後輩成親，霍震寰笑言恨飲新抱茶。佢個仔啟文早前密會賭王三房女兒何超雲，齊歎法國餐，但感情只係曇花一現。唔知啟文有新目標未呢？霍震寰就保持神秘，話啟文今年唔會結婚喎。霍家同賭王何鴻燊家族關係千絲萬縷，賭王陷入世紀爭產風波，霍震寰都送上關心，但佢慨嘆一句「清官難審家庭事」，相信賭王會知點處理喎。