政情：搞搞政：連任鄉局主席發叔要造勢

新界鄉議局尋日舉行新春團拜，主席劉皇發喺致辭時大爆猛料，話已經解決菜園村嘅路權問題，都算係拎個頭彩。

發叔話舊年麻煩多多，因為漏報物業買賣利益，令自己變成焦點；佢話吸取到教訓，亦令佢對現今香港政治生態文化有更深嘅體會同認識。咁有乜嘢體會？佢唔想講太多，只係留低八個字：「知所循道，明哲保身」；至於點「保身」，佢冇講清楚。

攞完頭彩，發叔當堂威水晒，跟住現場仲上演多一場大龍鳳。當佢準備行出場外接受訪問時，幾位村民突然衝上前，向佢遞咗一封要求佢連任鄉議局主席嘅信。發叔亦講咗句：「姜太公都八十歲先做官啦！」參唔參選，不言而喻。

發叔喺早前嘅村代表選舉遇到五十年嚟首次挑戰，事前又傳出「倒劉」行動，好彩最後大步檻過喺選舉勝出，而尋日嗰場團拜似係佢爭取連任嘅補鑊加造勢大會。

老實講，只有處於弱勢先要造勢，發叔呢場大龍鳳似乎係暗示要連任鄉議局主席仲有暗湧。所以話呢，大年初二發叔喺車公廟為香港祈福，求到嗰支籤嘅籤文嗰句「威人威威不是威」，睇嚟用喺佢身上都好貼切。