政情：田少打完流感針肚屙
富貴黨高層尋日下晝喺總部同傳媒見面，主席Miriam劉健儀、副主席方剛、「莎姐」周梁淑怡同黨嘅立法會飲食界議員張宇人早早到齊，但等極都未見榮譽主席田北俊。冇佢點可以成局？經莎姐拆解謎團，原來田少打完流感針唔舒服告假。
咦！朝早先喺一個團拜活動見到田少，當時佢精神好好㗎喎！打電話問候佢，佢話打完針後隨即肚痛同輕瀉，搞唔清係咪流感針副作用，總之就要休息，希望抖一、兩日就可以再重出江湖。
退黨黨員、西貢區議員「哪吒」方國珊尋日朝早喺團拜活動上巧遇田少，兩人再見亦是朋友。哪吒話日後佢嘅平台會喺專業動力，仲會同經濟動力多多合作添。
田少朝早出席一個新春團拜時並冇異樣，但其後肚痛同肚瀉。
莎姐（左起）、Miriam同方剛向大家拜年，手上揮春都係出自Miriam手筆。