政情：肥仔明謀篤爆毓民大舊
社民連成立以嚟製造唔少新仇舊恨，就算核心人物黃毓民同「大舊」陳偉業退咗黨，一樣被仇家狙擊。白鴿黨舊年支持政改方案，被社民連不斷批評同狙擊，相當難受，該黨立法會議員「肥仔明」李華明尋日喺傳媒面前提起件事時依然好㷫，斬釘截鐵咁話自己決定唔再參選立法會後，將無後顧之憂，誓要喺任期完結前同毓民、大舊死過，爆兩人大鑊。
肥仔明話依家該黨八位議員無論開會或私底下已冇再同毓民、大舊打招呼，佢仲諗過喺議員前廳安裝針孔攝錄機錄低兩人嘅衰嘢，等人知道兩人雖然喺議會上鬧高官，但私底下其實同建制派議員好老友。
多次話唔參選嘅肥仔明，喺舊年八月一次黨內機密會議上已表明去意已決，佢嘅空缺會由黨鞭司徒華生前力捧嘅黃大仙區議員胡志偉披甲上陣，相信勝出嘅機會好大喎！
肥仔明大讚觀塘樂華邨冬菇亭出品嘅魚蛋好味。