政情：陳繁昌叫鬍鬚曾科水

八間大學輪住搞春茗同各界拜年，今年打頭陣嘅係科技大學，趁住尋日「人日」，率先喺校長府邸向傳媒講吓新年大計。要發展，梗係要有錢先成事，校長陳繁昌就帶頭叫財爺鬚鬍曾開水喉，喺財政預算案度科水，畀多啲資源高等教育界，特別要再撥錢成立配對基金，等大學叫人捐錢都容易啲，話晒政府會一對一配對，對捐款人同大學嚟講都好吸引。

陳校長講開又順便同政府呻，話過去幾年，政府好落力搞私立大學，又成立基金、又撥地起校舍，相反對傳統公營大學就好似冇乜聲氣，雖然私立大學有佢一定嘅角色，但講到做研究、創新科技，始終係公營大學嘅強項，以歐美國家為例，除非係好有歷史嘅私立大學，否則都好難取代公營大學。

之後佢就食住上，話既然庫房水浸，政府大把錢，梗係要諗吓點使錢先得啦，為咗香港嘅下一代，一定要投資落教育度，加強香港同內地、國際嘅研究合作，提升香港整體嘅知識水平，唔係話今日畀錢，聽日就有回報，呢啲錢真係唔慳得，財爺應該好好考慮吓。佢仲爆料，話鬍鬚曾冇搵佢哋傾偈，唔知財爺係咪想喺預算案公布嗰陣，先畀個驚喜啲大學呢？

G5領科大繼續發展

鬍鬚曾收到冇？再做守財奴，因住累咗班大學生，亦即係香港未來嘅棟樑，呢條罪孭唔孭得起呀？

今年係科大創校二十周年，嚟緊會有連串慶祝活動，由校長同四位副校長組成嘅G5、即Group of Five，會帶領科大迎接第二、第三個二十年，當中新開設嘅大學拓展副校長職位，由總商會前行政總裁翁以登擔任。翁副校長話以前搞企業，最重要係建立品牌，大學最緊要就係講定位，未來科大會更加着重科研，訓練學生研究思維；喺硬件方面，嚟緊三年會有十幢教學大樓同宿舍陸續落成，配合大學四年制發展。