短打長擊：高官問責已死 事後廢噏至叻

「翻版阿珍」事件雖告平息，然而今次醜聞凸顯港式高官問責制得個殼，有軀體而全無靈魂。咁嘅人形物體，公眾輿論如何鞭撻，它也不會有甚麼反應。

政府施政一味齋噏唔做嘢，眼見旅遊業千瘡百孔，零團費、低團費、強迫購物、導遊無底薪一日存在，則「阿珍事件」永遠會複製下去，香港的「好客之道」必成國際笑柄。

事實擺在眼前，特區政府一眾高官「民心我心，休假至真」，旅遊之都變全國醜聞，事件年初三發生，商務及經濟發展局局長劉吳惠蘭年初五才好整以暇，施施然出來廢噏，你話香港明天點會好啊！

劉吳惠蘭恍如關公上身，義正詞嚴指出：同類事件一宗也不能接受，政府有決定及有信心，認真執行十項新措施。呢啲咁嘅官腔，唔該少講為妙，「同類事件一宗也不能接受」──咁你做咗幾多嘢？旅議會十招即使有針對性，你班高官有冇好好監管呢？

港府施政樣樣唔肯攬上身，一有問題，不管是芝麻還是西瓜，立即請顧問搞一大輪，之後又諮詢又檢討又報告，好似好忙，實則「勞而無功」，最後又重回基本點。年年話立法監管，又係得個吉！夕陽政府，一味等收工心態，讓空話廢話繼續飛。香港旅遊業若然繼續醜聞不絕，令內地旅客失去信心，不再來港消費玩樂，屆時政府想做嘢也為時已晚。

尼采說過：「人要麼永不做夢，要麼夢得有趣；人也必須學會清醒：要麼永不清醒，要麼清醒得有趣。」作為特區問責高官，沒有真功夫，好歹花拳繡腿也要耍得有趣些！來點創意吧，拜託拜託！