政情：搞搞政：「一宗都嫌多」高官鬥齋噏

商務及經濟發展局局長劉吳惠蘭前日回應被嘲為翻版「惡導遊阿珍」嘅「刀手蓉」林如蓉事件時，爆出一句「一宗都不能接受」。我哋翻查過呢幾年高官嘅講話，發現類似「一宗都嫌多」呢句說話，經已變成高官嘅口號。

煲呔曾喺○六、○八同○九年，分別就教師自殺、生果金同工業意外，用過「一宗都嫌多」呢句口號。但喺佢講完之後，香港嘅教育、福利同勞工政策有冇改善，大家都有眼睇，最弊其他局長照辦煮碗。

三司十二局當中，以勞工及福利局局長張建宗講得最多，可能係佢嘅政策範疇牽涉面廣啩，好似○七年發生喺銅鑼灣、○九年發生喺環球貿易廣場嘅工業意外，張建宗都喺現場拋句「工業意外一宗也嫌多」出嚟。

運輸及房屋局局長鄭汝樺同保安局局長李少光都有講過呢句說話，而講得最離譜嘅則要數政務司司長唐唐，佢喺舊年回應塌樹死人事件時話「（塌樹）令到人傷亡，一宗都嫌多……但香港打風落雨都會冧吓樹」，難怪畀人鬧涼薄。